Historie
33 jaor historie van De Jokers BieëgdjeWaat d’r aan väöraaf ging
In 1960 waerdje ónger de naam ‘De Jokers’ een karnavalsvereniging opgerichtj. Eine joker is eine nar, mer ouch de sjpeelkaart die se uueveral väör in kins zitte. Die vereniging reep op vastelaoveszunjig 12 fibbrewari 1961 Prins Funs I oet es ieërste Jokerprins van Bieëgdje. De c.v. De Jokers hieët mer zès vastelaovesprinse oetgerope. Bieëgdje haaj in die jaore nog gein harmonie dus mós ein prinsekapel ingehuuerdj waere en det kostj natuurlek geldj. Waarsjienlek vanwaege det kosteplaetje höbbe De Jokers in 1967 mótte besjoete ‘in röste’ te gaon.
Gelökkig heel de jeugdsoos ‘Second Home’ in die jaore de vastelaovendj ane gang. Vanaaf 1979 organizeerdjen Harmonie Crescendo en de voetbalklup het zgn. ‘HaVo-bal’ woeabie tot 1987 eder jaor eine prins oet de harmonie of voetbalklup waerdje oetgerope.
In 1988 haaj ’t HAVO-komite eine prins op ’t oug dae neet lid waas vanne voetbalklup en ouch neet vanne harmonie, Pierre Delissen. Mer Pierre wól allein prins waere es d’r aangesjproeake zooj waere es Jokerprins, net wie in de jaore ’60. En zoea gebäördje ‘t!
Vanaaf 1988 waas ’t neet langer mieër ein väörwaarde óm lid van de harmonie of de voetbalklup te zeen óm vastelaovesprins van gans Bieëgdje te waere. Ederein kós en mócht prins waere. Op initiatief van prins Pierre I waerdje dees prinse vanaaf 1988 es Jokerprins – dé Prins van Bieëgdje – aangesjproeake.
Nostalgie nao de jaore ’60 natuurlek mer die nostalgie waas waal de basis väör de sjtart vanne Sjtichting De Jokers Bieëgdje.
De Jokers Bieëgdje kinne van sjtart.
Toen ’t vastelaovessezoen ’91/’92 naderdje vónj men ’t toch tied waere det Bieëgdje ouch ein echte vastelaovesvereniging kreeg en det de Bieëgdjer prins zich echt Jokerprins mócht numme.
Op initiatief van semi-Jokerprinse Paul Pollaert en Bart Backes en ein paar lede van ’t vreugere HAVO-komité is begin 1992 vastelaovesvereniging De Jokers Bieëgdje opgerichtj.
Op 12 februari 1992 is de offisjele oprichtsakte bie notaris Smits in Thoear óngerteikendj door Paul Pollaert (väörzitter), Bart Backes (sikkretaris) en Jan (vanne Post) Gubbels (penningmeister).
12 fibbrewarie 1992, de officiële geboeartedatum van Sjtichting De Jokers Bieëgdje.
Behalve ’t HAVO-komité zeen väör en ouch nog effe nao de oprichting van ‘Sjtichting De Jokers Bieëgdje’ ouch anger vereniginge oet Bieëgdje in det zgn. ‘vastelaoves-gaat’ gesjprónge. Zoea organiseerdje de jeugdsoos ‘Second Home’ al hieël väöl jaore de jeugdvastelaovendj. Ze repe al in 1965 de ieërste jeugdprins oet. Vanaaf 1993 hieët ‘Sjtichting De Jokers Bieëgdje’ in good uueverlègk mèt de jeugdsoos, de organisasie róndj de jeugd-vastelaovenj uuevergenómme.
De organisasie van de Boerebroeloft, vanaaf 1987 georganiseerdj door ’t HAVO-komité, geit vanaaf 1992 uuever nao Sjtichting De Jokers Bieëgdje en Harmonie Crescendo droog in 1995 de organisasie van de Bóntje Aovendje uuever aan De Jokers.
De ieërste èllef jaor
De Sjtichting De Jokers Bieëgdje waas net druueg achter de oeare toen ze in ’t derdje jaor van häör besjtaon, in 1994 al geliek väör ein groeate organisasieklus waerdje geplaatstj.
Op 14 januari 1954 waerdje Peter Vaassen in Horst Limburgs Buuttekampioen mèt de buut ‘De Kleiermaeker’ en det beteikendje det De Jokers op kórte termien neet allein de organisasie van ein resepsie väör Peter móste organisere mer ouch de organisasie van de Limburgse Buuttekampioensjappe in januari 1995.
Ómdet in Bieëgdje gein gesjikdje ruumte waas väör zoeaväöl publiek woeare De Jokers ‘gedwónge’ oet te wieke nao Sjporthal ‘Reutsdael’ in Hael.
De 42 e buuttekampioensjappe waerdje ein groeat sukses mèt Ger Frenken oet Roggel es record-buuttekampioen mèt zien buut ‘Dae lèste haaj ich neet moge höbbe’.
Vanaaf 1996 weurdtj ’t oetrope van de Jokerprins neet mieër op vastelaoveszaoterdig gehaoje mer weurdtj väör ’t ieërst op zaoterdigaovendj de vastelaovendj begós mèt ein vastelaovesmès. Ein gebroek det nog sjteeds besjteit al is de mès neet mieër op zaoterdigaovendj mer op vastelaoveszunjigmörge.
In 1997 kriege De Jokers häör eige vlag en ouch eine noewe scepter. Ein óntwerp van Herman Claessen i.s.m. Jos Derckx.
Op 30 april 1999 is ‘t ‘Oranje-Bitter-Bal’. De Oranjezaal, het ‘Jokerpelies’ woea alles zich aafsjpeeldje geit definitief sjloete. Vanaaf noe zeen de Jokers väöral aangeweze op Gemeinsjapshoes ’t Leuke mèt aaf en toe ein oetsjtepke nao ‘Casino’ of nao ‘’t Jachthoes’.
Op 16 januari 2000 verenige de Bieëgdjer aod-prinse zich in ’t Bieëgdjer Aod Prinse Syndikaat (BAPS).
Baps sjtartj in 2000 op de 11 e vanne 11 e ’t viefdje sezoen, de vastelaovendj.
Ómdet De Oranjezaal definitief gesjloeate is, waerdtj väör ’t ieërste de vastelaovendj in ’t Leuke geveerdj.
In 2003 besjtaon De Jokers Bieegdje 1x11 jaor. Vanwaege det jubileum zeen De Jokers oetgenuuedj in de Zoepkoel in Vènlo.
Op 19 november 2003 organisere De Jokers Bieëgdje in ’t Leuke de 3 e väörrundje van de Groeat Limburgse Buuttekampioensjappe 2004.
De twieëdje èllef jaor
In 2005 besjteit de Joekskapel/Prinskapel ‘De Briljantjes’ 11 jaor en organiseertj Harmonie Crescendo ’t ieërste Bieëgdjer Vastelaovesleedjes Konkoer (BVK).
In 2006 kumptj (väörluipig) ein inj aan de Boerebroeloft op vastelaovesdinsdigmiddig en in 2007 reuptj de jeugdkemissie naeve de jeugdprins ouch ein jeugdprinses oet.
Op 15, 16 en 17 november 2013 viertj Sjtichting De Jokers Bieëgdje het ieërste deil van het 2x11 jaorig jubileum mèt ein groeats Jubileumweekend.
Ieërder in det jaor zeen De Jokers – ouch in ’t kader van ‘t 2x11 jaorig jubileum – op oetnuuediging van de BCL nao ‘t Knoevelemint in Mesjtreech gewaes.
’t Twieëdje deil van ‘t 2x11 jaorig jubileum weurdtj róndj de vastelaovendj in 2014 gevierdj.
Hoeagtepuntj is de ónthulling van De Polonais , ’t vastelaovesmonument aan de Kruutssjtraot. De Polonais is ein óntwerp van Jos Derckx.
Bie gelegenheid van dit 2X11-jaorig jubileum goof Sjtichting De Jokers Bieëgdje ein beukske oet ‘Vastelaovendj in Bieëgdje’ uuever de historie van de vastelaovendj in Bieëgdje.
De derdje èllef jaor
Tót 2019 geit alles zien gangetje. De Jokers keze häöre prins en jeugdjokerpaar. Pas in 2019 doon De Jokers weer van zich sjpraeke. De Jokers Bieëgdje kómme landelek in ’t noets, zelfs tót in Frieslandj toe. Prins Folkert I, eine echte Fries van geboearte is bie de Jokers vastelaovesprins gewoeare. Ziene sjpreuk: ‘It giet oan!’ Omrop Fryslân en ouch de Limburgse collegaas van L1 kómme nao Bieëgdje óm ein reportage te make.
In 2020 kumptj weer sinds lang ein Boerebroedspaar in de Bieëgderse vastelaovendj, Vera van Herten en Michiel Strous.
’t Jaor 2021 is ein coronajaor. Geine vastelaovendj! In de ganse werreldj zjwejtj Coronna de scepter. Prins Lars maag d’r nog ein jaor es Jokerprins (mer noe sónger sjteek) aanplekke.
Det geldtj ouch väör 2022 al is dit jaor bie ’t Jokermonument waal eine aojerwètse sjtraotvastelaovendj. Mer eine prins is d’r neet bie. Prins Lars I van 2020 maag nog ein jaor door. Hae vónj ’t neet erg.
In 2023 wón de basissjoeal St. Martinus het Kinjer Vastelaovesleedjes Konkoer mèt ’t leedje ‘Laot huuere des se bie ós huuers’.
Op 5 jannaewari 2024 maag Sjtichting De Jokers Bieëgdje in Gemeinsjapshoes ’t Leuke het Midde Limburgs Leedjes Festival (MLLF) organisere. 22 Finaliste haje zich aangemeldj. Winnaar waedje de groep ‘Raoj ins’ oet Naer mèt ’t leedje ‘Dien ouge sjtraole verhaole’. 2025 is ’t jaor van 3X11. Van vriedig 17 jannewari tót en mèt zunjig 19 jannewari sjtóng ein groeats jubileumfieëst in ’t Leuke op ’t programma.
Det zeen de hoeagtepuntje in 3x11 jaor Sjtichting De Jokers Bieëgdje